อุปฺปชฺชนฺติ ฯ โลกสฺสปิ โข เอตํ สิวก สจฺจสมฺมตํ ยถา ปิตฺตสมุฏฺฐานานิปิ อิเธกจฺจานิ
เวทยิตานิ อุปฺปชฺชนฺติ ฯ ตตฺร สิวก เย เต สมณพฺราหฺมณา เอวํวาทิโน เอวํทิฏฺฐิโน
ยํ กิญฺจายํ ปุริสปุคฺคโล ปฏิสํเวทยติ สุขํ วา ทุกฺขํ วา อทุกฺขมสุขํ วา สพฺพนฺตํ
ปุพฺเพกตเหตูติ ยญฺจ สามํ ญาตี ตญฺจ อติธาวนฺติ ยํ โลเก สจฺจสมฺมตํ ตญฺจ อติธาวนฺติ
ตสฺมา เตสํ สมณพฺราหฺมณานํ มิจฺฉาติ วทามิ ฯ เสมฺหสมุฏฺฐานานิปิ โข สิวก ฯ เป ฯ
วาตสมุฏฺฐานานิปิ โข สิวก ฯ เป ฯ สนฺนิปาตสมุฏฺฐานานิปิ โข สิวก ฯ เป ฯ อุตุปริณามชานิปิ
โข สิวก ฯ เป ฯ วิสมปริหารชานิปิ โข สิวก ฯ เป ฯ โอปกฺกมิกานิปิ โข สิวก ฯ เป ฯ
กมฺมวิปากชานิปิ โข สิวก อิเธกจฺจานิ เวทยิตานิ อุปฺปชฺชนฺติ ฯ สามํปิ โข สิวก
เอวํ เวทิตพฺพํ ยถา กมฺมวิปากชานิปิ อิเธกจฺจานิ เวทยิตานิ อุปฺปชฺชนฺติ ฯ โลกสฺสปิ
โข เอตํ สิวก สจฺจสมฺมตํ ยถา กมฺมวิปากชานิปิ อิเธกจฺจานิ เวทยิตานิ
อุปฺปชฺชนฺติ ฯ ตตฺถ สิวก เย เต สมณพฺราหฺมณา เอวํวาทิโน เอวํทิฏฺฐิโน ยํ กิญฺจายํ
ปุริสปุคฺคโล ปฏิสํเวทยติ สุขํ วา ทุกฺขํ วา อทุกฺขมสุขํ วา สพฺพนฺตํ ปุพฺเพกตเหตูติ
ยญฺจ สามํ ญาตํ ตญฺจ อติธาวนฺติ ยํ โลเก สจฺจสมฺมตํ ตญฺจ อติธาวนฺติ ตสฺมา
เตสํ สมณพฺราหฺมณานํ มิจฺฉาติ วทามีติ ฯ
อิติปิ มหาราช น โหติ สพฺพา เวทนา กมฺมสมุฏฺฐานา กมฺมวิปากชา สพฺพํ
อกุสลํ ฌาปยิตฺวา ตถาคโต สพฺพญฺญุตํ ปตฺโตติ เ อวเมว โข มหาราช ธาเรหีติ ฯ
สาธุ เอวเมตํ ภนฺเต ตถา สมฺปฏิจฺฉามีติ ฯ
ภควโต นิรวเสสํ อกุสลํ เฉตฺวา สพฺพญฺญุตํ

ปตฺตปญฺโห อฏฺฐโม ฯ

ภนฺเต นาคเสน ตุมฺเห ภณถ ยํ กิญฺจิ กรณียํ ตถาคตสฺส สพฺพนฺตํ โพธิยาเยว
มูเล ปรินิฏฺฐิตํ นตฺถิ ตถาคตสฺส อุตฺตรึ กรณียํ กตสฺส วา ปริจฺจโย อิทญฺจ เตมาสํ
ปฏิสลฺลีนํ ทิสฺสติ ยทิ ภนฺเต นาคเสน ยํ กิญฺจิ กรณียํ ตถาคตสฺส สพฺพนฺตํ โพธิยาเยว
มูเล ปรินิฏฺฐิตํ นตฺถิ ตถาคตสฺส อุตฺตรึ กรณียํ กตสฺส วา ปริจฺจโย อิทญฺจ เตมาสํ
ปฏิสลฺลีนนฺติ ยํ วจนํ ตํ มิจฺฉา ฯ ยทิ เตมาสํ ปฏิสลฺลีนํ ยํ กิญฺจิ กรณียํ ตถาคตสฺส
สพฺพนฺตํ โพธิยาเยว มูเล ปรินิฏฺฐิตนฺติ ยํ วจนํ ตํ มิจฺฉา ฯ ยตฺถิ กตกรณียสฺส
ปฏิสลฺลีนํ สกรณียสฺส ปฏิสลฺลีนํ ยถา นาม ภนฺเต นาคเสน สพฺยาธิกสฺส เภสชฺเชน